ANG LAKAS-PAGGAWA NG BANSA

Ang labor force o lakas-paggawa ay tumutukoy sa kabuuang bilang ng manggagawang may edad 15 taon

pataas, kabilang ang may trabaho, walang trabaho, at naghahanap ng trabaho. Ang labor force participation rate ay tumutukoy sa ratio ng kabuuang bilang ng mga taong kabilang sa lakas-paggawa kung ihahambing sa kabuuang populasyon na may gulang na 15 taon pataas.

Ang mga may trabaho o employed ay tumutukoy sa lahat ng mga may gulang na 15 taon pataas batay sa kanyang huling kaarawan na naiulat na nagtratrabaho, kabilang na rito ang may trabaho ngunit wala sa lugar ng trabaho dahil sa karamdaman, nagbakasyon, nagwelga, at iba pang dahilan. Ang mga walang trabaho o unemployed naman ay tumutukoy sa mga pansamantalang natanggal sa trabaho, naghahanap ng trabaho, o mga nais magtrabaho ngunit hindi magkaroon ng oportunidad na makapagtrabaho dahil sa karamdaman. Samantala, ang mga underemployed ay ang mga may trabaho, ngunit hindi natutugunan ang kumpletong oras ng paggawa dahil sa sariling kagustuhan o dahil sa hindi makahanap ng full-time na trabaho.