BAKIT ANG KAKAPUSAN AY ISANG SULIRANING PANLIPUNAN

Ang kakapusan ay isang suliraning pang-ekonomiya. Ngunit kadalasan, nagiging isang suliraning panlipunan

ang kakapusan.

Kaguluhan

Maraming digmaan, tunggalian ng mga pangkat, o away ng mag-anak na ang pinag-uugatan ay pagkamkam o hidwaan sa hangganan ng mga pag-aarin pinagkukunang-yaman tulad ng lupain. Ang pakikipaglaban ng ibang tao sa kanilang karapatan sa pagmamay-ari ay kadalasang nagiging marahas at madugo. Kalimitan, nauuwi ito sa pagpaslang sa kapwa, pananakop, pang-aapi sa mga nagapi, pagpupumilit ng kagustuhan kahit labag sa kalooban ng ibang tao, pagtanggi sa ibang lipi, o poot sa mga kamag-anak na nauuwi rin sa away ng mga angkan. Natututo ang mga tao na makipagkompetensiya sa isa’t isa para makapagmay-ari ng limitadong pinagkukunang-yaman.

Pagtaas ng Presyo ng Bilihin

Dahil sa kakapusan, karamihan ng mga bagay ay hindi libreng makakamtan. Mayroon itong katapat na halaga at kailangan itong bilhin. Ito ay tinatawag na mga bilihin o produkto. Kailangan ng mga itong magkaroon ng halaga o presyo upang hindi tuluyang maglaho.